سیاست، بریانی تے اسیی

 

اج کل گرمی نے تس کڈی ہوئی اے، سمجھ نیہں لگدی اے آگ دا گولہ ساڈے اے کنے پئہ گیا اے،تایا  جیراماجے نائی کول بیندیاں ہویاں بولیا۔

رب سوہنے دی مرضی اے چاہے گرمی ہوئے یا سردی سدا کنے رہنا اج آگ ور رئی اے تے کل ککڑ پالا پوئے گا۔ ماجے نائی نے اک گاک دا خط کردیا آکھیا۔

سنیا کمہاراں دا رمضان الیکشن لڑن لگا اے، پڑھ لکھ کے وی ویکھو کیڑے کمے ٹر پیا۔ تایا جیڑا ہر ویلے دی طرح اج وی گل ودان چہ لگیا سی۔

بلدیاتی الیکشن نیڑے آرئے نے تے اگلے مہینے ووٹاں پیئن گیا۔ پھٹے تے بیٹھے امجو نے وی گل وچ اپنا حصہ پایا-

جیتنا تے فیر چوھدری نے ای آ، اپنے کر دی سڑک پکی کرا لیئ تے پینڈ وچ آن والا رستہ فیر کچا دا کچا، سکول تے ہائی نیئں ہو سکیا پچھلے دس سالاں توں، ساڈی سوانیاں نوں دو پینڈ چل کے جانا پینڈا دسویں لئی۔ ماجا نائی بولیا۔

ڈاکٹر اے تے ڈاکٹری کرے، کسے غریب مریض دا علاج کرے، دعا لیوے، ایویں چوھدری بنن نوں ٹریا اے۔ تایا جیڑا گاک دے اٹھن توں بعد پھٹی تے بیندیا بولیا۔

تایا او دوائیاں والا ڈاکٹر نیئں، رمضان سیاسیات وچ پی ایچ ڈی کر کے آیا اے، امجو موچنے نال منہ دے اضافی وال کچھدیاں ہویاں بولیا۔

مرا منڈا وی میرے تے میری جنانی دے پیچھے پیا ہویا کہ ڈاکٹر نوں ووٹ پاویں اس دفعہ، پڑھیا لکھیا تے ہیگا پر چوھدری طرح کم نیئں کدا سکدا، پچھلے سال غلط فہمی وچ پولس مینوں چک کے لے گئی سی، دو دن تک نورے دی مجھ میرے تے پوندے رے تے ماردے رہے، تیجھے دن چوھدری نے آکے چھڑیا تے مجھ وی لیا کے دیتی اپنے اثرو رسوخ نال۔ ماجا نائی تایے جیڑے تے کپڑا پا کے تے اودھے بچے کھچے وال کٹن دی کوشش کرن لگ پیا۔

تایے جیڑے نوں کھنگ چھڑ پئی، بڑی مشکل نال ساہ سیدھا کردیاں بولیا، سب نوں پتہ کہ مجھ چودھری نے ہی چکوائی سی ، بھیر نے خود اپنی کنی سنیا چودھری نوں حاجی لالے نال گل کردیاں۔

ماجےے نائی نے اس توں بعد کوئی گل کرنا مناسب نئیں سمجھی تے وال کٹدا رہیا۔

-

جمعہ دا خطبہ شروع ہوگیا تے عرفان ہیجے وضو کر ریا سی۔ امام صاب وی اج چیئرمین دی سیٹ لیئ ہون والے الیکشن تے گل کر رہے سی۔ وضو کر کے عرفان چھاں لب کے مسجد دی اک نکڑ وچ بیٹھ گیا۔بجلی صبح دی آ ہی نئ رہی سی اس لئی اج کھالے توں نہا کے سیدھا مسجد ای آکے وضو کیتا۔ امام صاب دی آواز پورے گرجدار لہجے وچ گونج رہی سی

" حکمران چننا ایمانداری دا کم اے، کسے بے نمازی نوں چن کے اپنے رب نوں کی منہ واکھاو گے،کی داسو گے آگے جا کے کہ کدی بے ایمانی کر آوے آں، اس مسجد دی موٹر نوں خراب ہوئے تن مہینے ہو گئے کوئی پڑھیا لکھیا آ کے او تے لوا نیئں سکیا، آخر چوھدری صاب نوں ہی خیال آیا نمازیاں دی تکلیف دا، سب آکھو سبحان اللہ۔ "

نال ای بیٹھے بھیر نے ہلکی جی ٹوہ لائی جس دی آواز صرف بڑی مشکل نال عرفان تک ہی پہنچی۔ "کنک دے وی توڑے وی تے کل چوھدری صاب نے مسجد پیجے نے، سبحان اللہ"

عرفان نے ہس کے انہو ویکھیا تے سنتیاں پڑھن کھڑا ہو گیا۔

تایا جیڑا حکہ لے کے تھرے تے منجھی دھ کے گھڑ گھڑ کر ریا سی کہ عرفان ، نصیر تے وقاص وی سارے زمانے دیاں سٹوریاں سنن واسطے اودھے کول آ بیٹھے، تایا جیڑا پورے پینڈ وچ کُم کے آ کے شام نوں ہر اک نوں لوکاں دے راز کھول کھول دسدا سی۔ بوت دفعہ ہویا کے اس وجہ توں لوکاں دیاں لڑایاں وی ہویاں لیکن تایا جیڑا کدی وی باز نئیں آیا

چوھدری نے ویسے پھنگی قصائی نال کیتی زیادتی اے، پجاں ہزار کسے غریب دی عزت دا مل تے نیئں ہوسکدا ناں، عرفان نے تایے دے منجھے تے بیٹھدے ہوئے گل شروع کیتی۔

پتر اے کیڑا پہلی وار ہویا اے، چوھدری دا وی اپنے منڈے ورگا حساب ای سی، کدی کسے دی کڑی نوں چھیڑتا تے کدی کسے نوں کٹ دتا، اے تے کڑی دے مرن تے گل سامنے ائی اے ہن نیتے جدوں دے جمے آں اہی کجھ ویکھ رے آں، تایا جیڑا وی آج چوھدری دے خلاف ساڑ کدھ ریا سی۔

تے تایا اے ظلم کدی تے ختم ہونا آے ناں، سانوں اس کم نوں روکنا چاہیدا اے۔ عرفان نے تایے جیڑے ول ویکھدیاں گل کیتی۔

او پایئ وڈیا ساینیا، انج وی تے کسے نال پج ہی جانی سی پھنگی دی کڑی، پجاں ہزار نال اوس دا جہیز بناندا تے کر دیندا کسے قصائی نال ویاہ، پر اس کمی نوں بس پینڈہ چھڈن دی پیئ سی، ایتھے رہندا تے کڑی خودکشی ناں کردی۔وقاص نے عرفان ول کوری کدھ کے آکھیا-

یار عزت تے سب دی برابر ہوندی اے ، توں لے لا پجاں ہزار چوھدری کولوں تے کرن دے اونہوں یا اودھے پتر نوں سب کجھ۔ عرفان دی صلاح اج وقاص کولوں مار کھان دی لگ رہی سی۔

اوے منہ سنمھال کے گل کر ، اسیی اپنی کڑیاں فصلاں چہ نیئں چھڈی دیاں صبح توں شام تک، نالے چوھدری نمازی پرہیزی بندا، اودا منڈا صرف ایس طرح دا۔بندا اپنا کرھ سانبھے کسے نوں کجھ کہین توں پہلاں۔وقاص منجھی توں اٹھ کے منہ وچ چگ لیندیا ہویا بولیا

بڑا نمازی پرہیزی اے ، باغ والی ساری چوکیدارے دی زمین تے قبضہ کیتی کھولوتا، قرضے دے کے سود لیندا تے آئے دن کوئی نہ کوئی کمی اپنی عزت دا رونا رو رہیا ہوندا، عرفان دا غصہ نال برا حال ہوریاسئ۔

تیرے وچ اج کل ڈاکٹر بول رہیا، ووٹاں پیئن دے فیر ویکھیں ڈاکٹر چوھدری دا منشی بنن دی درخواست دیوے گا، وقاص تھرے توں لتھدے ہوؤے بولیا۔

نصیر وی اودے نال تر پیا تے عرفان اوتھے بیٹھا سوچاں وچ گم ہو گیا۔

اٹھ مندیا میں منجھی اندر کرنی اے، لڑنا ہونڈا تے گراؤنڈ ول جا کے لڑیا کرو میری غریب دی منجی نا توڑ دینا۔

عرفان اتھوں سدھا مسجد آلے وڈے چوک وچ پہنچیا جیتھے اج ڈاکڑ دا جلسہ سی۔ پتہ نی کیتھوں سو دو سو کرسی اکٹھی کیتی ہوئی سی تے کو ئی دس بزرگ اگلی سیٹاں تے بیٹھے سی باقی ساریاں کرسیاں تے بچے کھیل ریے سی۔

جلسہ شروع ہون وچ ٹائم سی۔ ڈاکٹر عرفان نوں ویکھ کے اودھے کول آگیا،

ہور بھئی جواناں ، کیتھی پہنچی پڑھائی، ڈاکٹر نے گل دا آغاز کیتا۔

ابے نے چھڑوا دیتی، کہندا اپنا نائیاں دا کم سکھ لے پڑھایاں چہ کجھ نہیں رکھیا۔ عرفان نے ماجے نائی دے الفاظ دہرا دتے۔

کیوں بھئی سب کجھ پڑھائی وچ ای تے ہیے، توں پرائیوٹ پیپر دے لے تیرا داخلہ میں پیج دواں گا اس واری۔ اپنا کم وی سکھدا رہ، پڑھ کے ہی پتہ چلے گا نہ کی سئی تے کی غلط۔،ڈاکٹر صاب ایہہ کہہ کے سٹیج تے پہنچ گئے تے تقریر شروع کر دتی۔

 ڈاکٹر صاب، جیڑے لاہوروں سیایات دے وچ ڈاکٹر دی ڈگری لے کے آئے سن پتہ نہیں کی سوچ کے اس دفعہ الیکشن وچ وڑ گیے نے، جا کے پڑھاو لکھاو کیتے، عرفان نے سوچیا۔ سیاست وچ شریف بندے دا کی کم۔

'میں سیاست  دی بجائےشہر وچ پڑھا کے پیسے کما سکدا سی لیکن میرے اپنے لوگ ایتھے انصاف پیچھے تکے کھان تے میں شہر وچ گڈیاں چوٹاں ایہہ مینوں گوارا نہیں، ایسے لیے سب چھڈ کے پیںڈ آگیا تاکہ کجھ اس پینڈ دی حالت درست ہو سکے، لوکاں نوں انصاف ملے، برابری ہوئے ، ظلم نہ ہوئے' ڈاکٹر صاب تے خوب بول رہے سن۔

آ جا کے الیکشن دا دیار وی آگیا-

پجاں روپے تے دوپہر نوں بریانی دی اک اک پلیٹ وی آکھی اے چوھدری صاب نے اوتوں ڈاکڑ خود پوکھا ننگا نالے ذات دا کمیار، چوھدری ہے تے ساڈی اپنی برادری دا، وقاص نے نصیر نوں سمجھایا۔ 

ویکھ لینا ڈاکڑ جیڑا بڑیاں انصاف دیاں گلاں کردا انوں اودھے اپنے گھر آلیاں نے ووٹ نئی پاؤنا ۔میں سنہیا اوڈا ابا اونوں چڑک رہیئا کے انہا پڑھ کے اگر اونہے سیاست ای کرنی سی تے شہر جان دی بجائے ایتھے بدمعاشی کردا فیر شید اک ادھ ووٹ پیہ جاندا۔وقاص اج کھل کے ڈاکٹر دے پیچھے پیا سی۔

مقابلہ بہت ساریاں چیزاں وچ سی، جہالت تے علم وچ، انصاف تے ظلم وچ، کمی تے چوھدری وچ ، سچ اے کے پینڈ وچ کمی بہت زیادہ تعداد وچ سن لیکن جاہل تے ظالم والا پلڑا وی بہت وزنی سی، چوھدری توں ڈر کے ظلم دا ساتھ دین والے زیادہ سن۔

شروع دے وچ ڈاکٹر دے پولنگ بوتھ تے عرفان نے کافی لوگ جمع کر رکھے سن کہ فیر اک بندہ آیا کہندہ چوھدری نے آکھیا اے کے پجاں دی بجائے ہر ووٹر نوں ڈھائی سو روپیہ ملے گا نال بریانی دی پلیٹ الگ ۔ اے گل دے نال ای کوئی ادھے لوکی غایب ہوگئے، 

رات تک عرفان تے ڈاکٹر نتیجے دا انتظار کردے رئے حالانکہ لوکاں دے روئیے توں انہاں نوں نتیجے دا اندازہ ہوگیا سی، دوپہر توں چوھدری دے گر ٹول وجدا ریا۔ پولنگ دے عملے لئی بکرا کیتا گیاسی تے ہر دو گھنٹے بعد چوہدری دے ڈھیرے توں چاہ وی پہنچ ری سی۔

ڈاکٹر نوں ووٹاں دا دسواں حصہ وی نیئں پیا، عرفان ساری رات سوچدا ریا کہ پینڈ دے لوگ کنے ایماندار نے کہ جدی بریانی کھادی انوں ہی ووٹ دتا، حالانکہ کوئی اناں نوں ویکھ تے نئیں ریا سی کہ کنوں ووٹ پاندے۔

اگلے دن ڈاکٹر صبح ہی لاہور جا چکیا سی، الیکشن توں چار مہینے بعد عرفان نوں یونیورسٹی دی رجسٹریشن سلپ ملی، تے عرفان جا کے ماجے نائی کول کھڑا ہوگیا۔

'ابا اگلا الیکشن میں لڑاں گا، توں بس چنگی جئی بریانی بنان دی تیاری کر'